ভাৰতৰ প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে ঘানা সংসদত দিয়া ভাষণত ভাৰতৰ গণতন্ত্ৰক প্ৰশংসা কৰে। প্ৰধানমন্ত্ৰী মোদীয়ে কয়, ‘‘গণতন্ত্ৰ কেৱল ভাৰতৰ ব্যৱস্থা নহয়, বৰঞ্চ আমাৰ মৌলিক মূল্যবোধৰ এক অংশ।’’ ভাষণৰ সময়ত প্ৰধানমন্ত্ৰীয়ে ভাৰতত ২৫০০টা ৰাজনৈতিক দল আছে বুলি সদৰী কৰা তথ্যই ঘানাৰ সাংসদসকলক স্তম্ভিত কৰি তোলে।
প্ৰধানমন্ত্ৰীগৰাকীয়ে লগতে কয়, ‘‘মই পুনৰ কওঁ, ভাৰতত ২৫০০ৰো অধিক ৰাজনৈতিক দল আছে। ২০টা ভিন্ন দলে বিভিন্ন ৰাজ্য, ২২টা চৰকাৰী ভাষা আৰু হাজাৰ-হাজাৰ উপভাষাক প্ৰতিনিধিত্ব কৰে। এইটোৱেই কাৰণো যে ভাৰতলৈ অহা লোকসকলক সদায় খোলা অন্তৰৰে আদৰণি জনোৱা হৈছে।’’
মোদীয়ে কয়, ‘‘প্ৰকৃত গণতন্ত্ৰই আলোচনা আৰু বিতৰ্কক প্ৰসাৰিত কৰে। ই মানুহক একত্ৰিত কৰে। প্ৰকৃত গণতন্ত্ৰই মৰ্যাদাক সমৰ্থন কৰে আৰু মানৱ অধিকাৰক প্ৰসাৰিত কৰে। ভাৰত আৰু ঘানাৰ ইতিহাসত ঔপনিৱেশিক শাসনৰ দাগ আছে, কিন্তু তেওঁলোকৰ আত্মা সদায় মুক্ত আৰু নিৰ্ভীক হৈয়েই আছে।’’
ইয়াৰ পূৰ্বে প্ৰধানমন্ত্ৰী মোদীক তেওঁৰ প্ৰভাৱশালী বিশ্ব নেতৃত্বৰ বাবে ‘The Officer of the Order of the Star of Ghana’ সন্মান প্ৰদান কৰা হয়। মোদীয়ে এই বঁটা গ্ৰহণ কৰে ঘানাৰ ৰাষ্ট্ৰপতি জন ড্ৰামানী মহামাৰ পৰা। বঁটা গ্ৰহণ কৰি দিয়া ভাষণত প্রধানমন্ত্ৰী মোদীয়ে কয় যে এই বঁটা তেওঁৰ বাবে অতি গৌৰৱ আৰু সন্মানৰ বিষয়। দুয়োখন দেশৰ যুৱক-যুৱতীসকলৰ আকাংক্ষা আৰু উজ্জ্বল ভৱিষ্যৎ, ঘানা আৰু ভাৰতৰ মাজৰ ঐতিহাসিক সম্পৰ্ক আৰু তেওঁলোকৰ চহকী সাংস্কৃতিক পৰম্পৰা আৰু বৈচিত্ৰ্যৰ প্ৰতি উৎসৰ্গা কৰি তেওঁ কয়, ‘‘মই ১৪০ কোটি ভাৰতীয়ৰ হৈ এই বঁটাটো বিনম্ৰভাৱে গ্ৰহণ কৰিছোঁ।’’