পৰিয়ালৰ ভৰণ-পোষণৰ তাগিদাত বহিঃৰাজ্যলৈ গৈ উপাৰ্জনৰ পথ বাছি লোৱা গহপুৰৰ এগৰাকী যুৱকে অৱশেষত কফিনবন্দী হৈ ঘৰলৈ উভতি আহিবলগীয়া হোৱা এক হৃদয়বিদাৰক ঘটনাই সমগ্ৰ অঞ্চলটোত গভীৰ শোকৰ ছাঁ পেলাইছে। তেলেংগানাৰ এটা ব্যক্তিগত খণ্ডৰ কোম্পানীত চিকিউৰিটি গাৰ্ড হিচাপে কৰ্মৰত গহপুৰ আৰক্ষী থানাৰ অন্তৰ্গত ৰজাবাৰী নিবাসী ঘনশ্যাম বৰাই সতীৰ্থৰ ডেগাৰৰ আক্ৰমণত গুৰুতৰভাৱে আহত হৈ চিকিৎসাধীন অৱস্থাত মৃত্যুক আঁকোৱালি লয়।
জানিব পৰা মতে, ঘনশ্যাম বৰাই তেলেংগানাৰ এটা ব্যক্তিগত কোম্পানীত চিকিউৰিটি গাৰ্ড হিচাপে কৰ্মৰত আছিল। একেটা কোম্পানীতে লখিমপুৰৰ কোষেশ্বৰ দাস আৰু বিতুপন দাস নামৰ দুজন যুৱকো কৰ্মৰত আছিল। যোৱা ১৫ আগষ্টৰ নিশা কোনো এক কথাক লৈ তিনিওজনৰ মাজত কাজিয়াৰ সূত্ৰপাত হয়। অভিযোগ অনুসৰি, ঘনশ্যাম বৰাই পাবলগীয়া ধাৰলৈ দিয়া টকা ঘূৰাই বিচৰাৰ বাবেই কোষেশ্বৰ দাস আৰু বিতুপন দাসৰ সৈতে তেওঁৰ বাক-বিতণ্ডাৰ সৃষ্টি হয়।
পিছত এই বাক-বিতণ্ডাই ক্ৰমাৎ ভয়ংকৰ ৰূপ ধাৰণ কৰে।
অভিযোগ অনুসৰি, কোষেশ্বৰ দাসে ডেগাৰেৰে ঘনশ্যাম বৰাক হানি-খুঁচি গুৰুতৰভাৱে আহত কৰে। এই আক্ৰমণত বিতুপন দাসেও সহযোগ কৰাৰ অভিযোগ উত্থাপিত হৈছে। আক্ৰমণৰ ফলত ঘনশ্যাম বৰা গুৰুতৰভাৱে আহত হৈ সংকটজনক অৱস্থাত পৰে। ঘটনাৰ পিছতে সহকৰ্মী আৰু সংশ্লিষ্ট লোকসকলে তেওঁক ততাতৈয়াকৈ চিকিৎসাৰ বাবে স্থানীয় ৰংগা ৰেড্ডী হাস্পতালত ভৰ্তি কৰায়। কিন্তু চিকিৎসাধীন অৱস্থাত তেওঁৰ স্বাস্থ্যৰ বিশেষ উন্নতি নোহোৱাত অধিক উন্নত চিকিৎসাৰ বাবে তেওঁক হায়দৰাবাদৰ ওছমানিয়া জেনেৰেল হাস্পতাললৈ স্থানান্তৰ কৰা হয়।
উক্ত চিকিৎসালয়তো মৃত্যুৰ সৈতে যুঁজি অৱশেষত যোৱা ২৪ আগষ্টৰ নিশা ঘনশ্যাম বৰাই শেষ নিশ্বাস ত্যাগ কৰে। কৰ্মসংস্থাপনৰ বাবে সুদূৰ তেলেংগানালৈ যোৱা গহপুৰৰ যুৱকজনৰ আকস্মিক মৃত্যুৰ খবৰে পৰিয়ালৰ লগতে আত্মীয়-স্বজন আৰু গাঁওবাসীক শোকস্তব্ধ কৰি তোলে। পৰৱৰ্তী সময়ত অসম চৰকাৰৰ শ্ৰদ্ধাঞ্জলি আঁচনিৰ জৰিয়তে কালি সন্ধিয়া ঘনশ্যাম বৰাৰ মৃতদেহ ৰজাবাৰীৰ নিজ বাসগৃহলৈ অনা হয়।
মৃতদেহ ঘৰ আহি পোৱাৰ লগে লগে সমগ্ৰ পৰিয়ালটোত কান্দোনৰ ৰোল উঠে। সুস্থ শৰীৰে পৰিয়ালৰ মুখত হাঁহি বিৰিঙাবলৈ উপাৰ্জনৰ আশাত বহিঃৰাজ্যলৈ যোৱা ঘনশ্যাম বৰা অৱশেষত কফিনত মৃতদেহ হৈ ঘৰলৈ উভতি অহা দৃশ্যই উপস্থিত সকলোকে মৰ্মাহত কৰি তোলে। মৃত্যুৰ সময়ত ঘনশ্যাম বৰাই পত্নীৰ লগতে এটি কণমানি সন্তান আৰু আত্মীয়-কুটুমক ইহসংসাৰত এৰি থৈ যায়। পৰিয়ালটোৰ অন্যতম উপাৰ্জনক্ষম ব্যক্তিগৰাকীৰ এনেদৰে অকাল মৃত্যুত এতিয়া পৰিয়ালটো গভীৰ অনিশ্চয়তাৰ সন্মুখীন হোৱা বুলি জানিব পৰা গৈছে।
ইফালে, ঘটনাটোক কেন্দ্ৰ কৰি ৰজাবাৰী অঞ্চলৰ ৰাইজৰ মাজতো তীব্ৰ প্ৰতিক্ৰিয়াৰ সৃষ্টি হৈছে। ঘনশ্যাম বৰাক আক্ৰমণ কৰি মৃত্যুৰ মুখলৈ ঠেলি দিয়াৰ অভিযোগ উত্থাপিত হোৱা কোষেশ্বৰ দাস আৰু বিতুপন দাসক শীঘ্ৰে গ্ৰেপ্তাৰ কৰি ঘটনাৰ উচিত তদন্ত কৰাৰ লগতে দোষ প্ৰমাণিত হ'লে কঠোৰ আৰু দৃষ্টান্তমূলক শাস্তি প্ৰদান কৰিবলৈ পৰিয়ালৰ লোক আৰু স্থানীয় ৰাইজে আৰক্ষী-প্ৰশাসনৰ ওচৰত দাবী জনাইছে।
জানিব পৰা মতে, ঘটনাৰ পিছৰে পৰা অভিযুক্ত কোষেশ্বৰ দাস আৰু বিতুপন দাস পলাতক হৈ আছে।এই ঘটনাৰ উচিত তদন্তৰ জৰিয়তে প্ৰকৃত সত্য পোহৰলৈ অহাৰ লগতে মৃত যুৱকজনৰ পৰিয়ালে ন্যায় লাভ কৰিব বুলি আশাবাদী স্থানীয় ৰাইজ।