নিমিষতে অগ্নিকাণ্ডত পৰিণত ৬,৫০০ কিলোগ্ৰাম ওজনৰ ফাইটাৰ জেট

 

ডুবাইৰ উজ্জ্বল দুপৰীয়াৰ আকাশ নীলা আছিল, আকাশত উদযাপনৰ শব্দ, সকলোৰে দৃষ্টি ওপৰত নিবদ্ধ। ভাৰতৰ ৬,৫০০ কিলোগ্ৰাম ওজনৰ ছুপাৰছনিক তেজছ Mk-1A যুদ্ধ বিমানে ঈগলৰ দৰে উৰণৰ প্ৰস্তুতি চলাইছিল। ১৩,০০০ কিলো পৰ্যন্তলৈ টেক-অফৰ ক্ষমতা থকা এই ফাইটাৰ জেটখন সেই সময়ত বতাহ ফালি গৈ আছিল আৰু হঠাৎ যেন আকাশৰ পৰা পিচলি পৰিল। কিছু মুহূৰ্তৰ পূৰ্বে আকাশত বতাহ ফালি আগবাঢ়িছিল, কিন্তু পিছ মুহূৰ্ততে আৰম্ভ হয় ফ্ৰী-ফল। ভূপতিত হোৱাৰ লগে লগে অগ্নিকুণ্ডত পৰিণত হয় বিমানখন। ডুবাই এয়াৰ শ্ব’ত যিসকলে এই দৃশ্য প্ৰত্যক্ষ কৰে, সকলোৱে নিজৰ আসনৰ পৰা থিয় হয়, কিছু সময়ৰ বাবে শ্বাসৰুদ্ধ হৈ পৰে। মুহূৰ্ততে বিমানখন অগ্নিকুণ্ডত পৰিণত হয়।

ছেকেণ্ডতে সকলো শেষ

ভূপতিত হোৱাৰ লগে লগে Mk-1A বিমানখন ছেকেণ্ডতে জুইৰ লেলিহান শিখাই আগুৰি ধৰে। জুই আৰু ধোঁৱাই আৱৰি ধৰে। দুৰ্ঘটনাৰ পিছত পোহৰলৈ অহা ভিডিঅ’ কোনো বেয়া সপোনৰ দৰেই। বিমানখন পোনে পোনে তললৈ নামি আহে আৰু মুহূৰ্তৰ ভিতৰতে জ্বলি চাৰখাৰ হৈ পৰে। ভাৰতীয় বায়ুসেনাই সন্ধিয়াৰ ভাগত বিমানখনৰ পাইলটগৰাকী শ্বহীদ হোৱাৰ কথা নিশ্চিত কৰিছে। আইএএফৰ বিবৃতিয়ে সমগ্ৰ দেশতে শোকৰ ছাঁ পেলাইছে। বিবৃতিত কোৱা হৈছে, ‘‘আজি ডুবাই এয়াৰ শ্ব’ৰ সময়ত ভাৰতীয় বায়ুসেনাৰ এখন তেজছ বিমান দুৰ্ঘটনাগ্ৰস্ত হয়। এই দুৰ্ঘটনাত পাইলটজন গুৰুতৰভাৱে আহত হোৱাৰ ফলত মৃত্যু হয়। ভাৰতীয় বায়ুসেনাই এই ক্ষতিত গভীৰ দুখ প্ৰকাশ কৰিছে আৰু শোকসন্তপ্ত পৰিয়ালবৰ্গৰ সৈতে থিয় দিব।’’