দেশত নতুন শ্ৰম আইন (Labour laws) আজিৰে পৰা কাৰ্যকৰী হ’ল। ইয়াক লেবাৰ ছিষ্টেমত এইপৰ্যন্ত সৰ্ববৃহৎ পৰিৱৰ্তন বুলি কোৱা হৈছে। প্ৰধানমন্ত্ৰী নৰেন্দ্ৰ মোদী চৰকাৰে চাৰিটা নতুন শ্ৰম সংহিতাক আনুষ্ঠানিকভাৱে কাৰ্যকৰী কৰিলে। চৰকাৰৰ দাবী, এয়া কেৱল আইনী আপডেট নহয়, বৰং ভাৰতৰ ৪০ কোটিৰো অধিক শ্ৰমিকৰ জীৱনত এক ঐতিহাসিক বিপ্লৱ। নতুন শ্ৰম সংহিতাই সৰ্বপ্ৰথমে সকলো কৰ্মচাৰীক সময়মতে ন্যূনতম বেতনৰ গেৰাণ্টি প্ৰদান কৰিব। এতিয়া পলম, মইমতালি আৰু শোষণ নীতি শেষ হ’ব। যুৱ প্ৰজন্মৰ বাবে চাকৰিত নিযুক্তিপত্ৰ অনিবাৰ্য কৰা হৈছে যাতে চাকৰি আৰম্ভ হোৱাৰ লগে লগে তেওঁলোকৰ অধিকাৰ সুৰক্ষিত হয়। মহিলাসকলৰ বাবে Equal Payৰ স্পষ্ট নিয়ম কাৰ্যকৰী হ’ব, যাৰ জৰিয়তে কৰ্মস্থলীত লিংগ বৈষম্যৰ অন্ত পৰে।
সামাজিক নিৰাপত্তাৰ অধীনত ৪০ কোটি শ্ৰমিক অহাৰ ফলত দেশৰ কৰ্মশক্তি প্ৰথমবাৰৰ বাবে এই পৰিসৰত সুৰক্ষিত হ’ব। ফিক্স টাৰ্ম কৰ্মচাৰীসকলক কেৱল এবছৰৰ চাকৰিৰ পিছত গ্ৰেচুইটীৰ অধিকাৰ দিয়া হৈছে। এই পৰিৱৰ্তন লাখ লাখ কৰ্মচাৰীৰ বাবে সকাহ হ’ব যিসকলে ঠিকাভিত্তিক হিচাপে কাম কৰে আৰু স্থায়ী কৰ্মচাৰীৰ দৰে নিৰাপত্তা লাভ নকৰে। ৪০ বছৰৰ ওপৰৰ সকলো কৰ্মচাৰীৰ বাৰ্ষিক বিনামূলীয়া স্বাস্থ্য পৰীক্ষা বাধ্যতামূলক কৰা হৈছে। ইয়াক চৰকাৰে ৱৰ্কফ’ৰ্চৰ দীৰ্ঘকালীন স্বাস্থ্যৰ ক্ষেত্ৰত বিনিয়োগ হিচাপে গণ্য কৰিছে। অভাৰটাইম কৰাসকলৰ বাবে এতিয়া ডাবল বেতনৰ ব্যৱস্থা কৰা হৈছে, যাৰ জৰিয়তে শোষণৰ আশংকা শেষ হ’ব আৰু অতিৰিক্ত কষ্টৰ সঠিক মূল্য লাভ কৰিব।