তিনিদিনৰ মুখ্যমন্ত্ৰীৰ তদাৰকী কোষৰ জিম্মালৈ প্ৰেৰণ কৰা হ’ল বিতৰ্কিত ACS বিষয়া নূপুৰ বৰা আৰু লাটমণ্ডল সুৰজিৎ ডেকাক। কামৰূপ (মেট্ৰ’)ৰ বিশেষ সত্ৰ ন্যায়াধীশৰ আদালতত হাজিৰ কৰোৱা হৈছিল নূপুৰ আৰু সুৰজিতক। আদালতে দুয়োকে তিনিদিনৰ বাবে চিএম ভিজিলেঞ্চৰ জিম্মালৈ প্ৰেৰণ কৰে দুই অভিযুক্তক।
শেহতীয়াকৈ পোহৰলৈ অহা তথ্য অনুসৰি আয়তকৈ ৪১৬% বহিৰ্ভূত সম্পত্তিৰ গৰাকী হৈছিল নূপুৰ বৰা। আজিৰ দিনটোলৈ নূপুৰ বৰাই মুঠ ৪৫ লাখ টকা দৰমহা লাভ কৰিছে। নূপুৰ বৰাৰ ১৪ডাল সোণৰ চেইন উদ্ধাৰ কৰিছে মুখ্যমন্ত্ৰীৰ তদাৰকী কোষে। ২ডাল হীৰাৰ নেকলেছ, হীৰাৰ আঙঠি ১৫টা, হীৰাৰ ব্ৰেছলেট ৩ডালো উদ্ধাৰ কৰা হৈছে। গুৱাহাটীৰ ৩ ঠাইত ফ্লেট আছে নূপুৰৰ। গুৱাহাটীৰ ২ স্থানত আছে মাটি। গুৱাহাটীৰ গোটানগৰস্থিত নূপুৰ বৰাৰ ঘৰৰ পৰা নগদ ৯২ লাখ ৫০ হাজাৰ ৪শ টকা উদ্ধাৰ কৰা হৈছে। বৰপেটাৰ ভাৰাঘৰৰ পৰা নগদ ১০ লাখ টকা উদ্ধাৰ কৰা হৈছে।
এই ঘটনাই সমগ্ৰ অসমতে আলোড়নৰ সৃষ্টি কৰিছে। নূপুৰ বৰা অসম অসামৰিক সেৱাৰ বিষয়া। বৰ্তমান কামৰূপ জিলাৰ গৰৈমাৰীৰ ৰাজহ চক্ৰ বিষয়া হিচাপে কৰ্মৰত নূপুৰ। সোমবাৰে মুখ্যমন্ত্ৰীৰ তদাৰকী কোষে নূপুৰৰ ঘৰত দিনজোৰা তালাচী চলায়। তালাচী আৰু জেৰাৰ অন্তত গ্ৰেপ্তাৰ কৰা হয় নূপুৰক। ২০১৯ চনত অসম লোকসেৱা আয়োগৰ সংযুক্ত প্রতিযোগিতামূলক পৰীক্ষাত উত্তীৰ্ণ হৈছিল প্ৰাক্তন কটনিয়ান নূপুৰ। প্ৰশাসনিক বিষয়া হিচাপে নূপুৰ বৰাৰ কেৰিয়াৰ আৰম্ভ হৈছিল কাৰ্বি আংলং জিলাৰ সহকাৰী আয়ুক্ত হিচাপে। ২০২৩ চনলৈকে সেই পদত কাৰ্যনিৰ্বাহ কৰিছিল নূপুৰ বৰাই।