জন্মদিনৰ দিনটোতে প্রধানমন্ত্ৰী মোদীয়ে গ্ৰহণ কৰিলে বিশেষ পদক্ষেপ! সমগ্ৰ দেশতে ‘স্বাস্থ্যৱতী নাৰী

 

প্ৰধানমন্ত্ৰী নৰেন্দ্ৰ মোদীয়ে আজি মধ্যপ্ৰদেশৰ ধৰত অষ্টম ৰাষ্ট্ৰীয় পোষণ মাহৰ লগতে ‘স্বাস্থ্যৱতী নাৰী, শক্তিশালী পৰিয়াল’ (SNSP) শীৰ্ষক এক অভিযানৰ শুভাৰম্ভ কৰে। এই অনুষ্ঠানত মধ্য প্ৰদেশৰ মুখ্যমন্ত্ৰী মোহন যাদৱো উপস্থিত থাকে। হাৰিয়ানাৰ পৰা কেন্দ্ৰীয় স্বাস্থ্যমন্ত্ৰী জগত প্ৰকাশ নড্ডাই এই অনুষ্ঠানত যোগদান কৰে, য’ত তেওঁ হাৰিয়ানাৰ নয়ব সিং ছাইনী আৰু হাৰিয়ানাৰ স্বাস্থ্যমন্ত্ৰী আৰ্তি সিং ৰাওৰ উপস্থিতিত একাধিক স্বাস্থ্য শিবিৰ উদ্বোধন কৰে। একেদৰে, কেন্দ্ৰীয় স্বাস্থ্য বিভাগৰ ৰাজ্যিক মন্ত্ৰী প্ৰতাপৰাও যাদৱে মুম্বাইৰ যশৱন্তৰাও চাভান কেন্দ্ৰৰ পৰা আৰু অনুপ্ৰিয়া পেটেলে দিল্লী সচিবালয়ৰ পৰা এই অনুষ্ঠানত অংশগ্ৰহণ কৰে। দিল্লীৰ পৰাই অংশগ্ৰহণ কৰে দিল্লীৰ মুখ্যমন্ত্ৰী ৰেখা গুপ্তায়ো।

‘স্বাস্থ্যৱতী নাৰী, শক্তিশালী পৰিয়াল’ অভিযান ভাৰতৰ মহিলা আৰু শিশুৰ বাবে এতিয়ালৈকে সৰ্বাধিক স্বাস্থ্য প্ৰসাৰ হিচাপে চিহ্নিত কৰা হৈছে। প্ৰকাশিত তথ্য অনুসৰি, স্বাস্থ্য আৰু পৰিয়াল কল্যাণ মন্ত্ৰণালয় (MoHFW) আৰু মহিলা আৰু শিশু উন্নয়ন মন্ত্ৰণালয়ৰ (MoWCD) যৌথ নেতৃত্বত ১৭ ছেপ্টেম্বৰৰ পৰা ২ অক্টোবৰলৈ আয়ুষ্মান আৰোগ্য মন্দিৰ, কমিউনিটি হেল্থ চেণ্টাৰ (চি এইচ চি), জিলা চিকিৎসালয় আৰু অন্যান্য চৰকাৰী স্বাস্থ্য সুবিধাসমূহ দেশৰ বিভিন্ন প্ৰান্তত ১০ লাখৰো অধিক স্বাস্থ্য শিবিৰৰ আয়োজন কৰি মহিলাকেন্দ্ৰিক প্ৰতিৰোধমূলক ব্যৱস্থা, সম্প্ৰদায় ভিত্তিক প্ৰচাৰ আৰু নিৰাময়মূলক স্বাস্থ্য সেৱা প্ৰদান কৰা হ’ব।এই অভিযানে অসংক্ৰামক ৰোগ, ৰক্তহীনতা, যক্ষ্মা আৰু চিকেল চেল ৰোগৰ পৰীক্ষা, আগতীয়াকৈ ধৰা পেলোৱা, আৰু চিকিৎসাৰ সংযোগ শক্তিশালী কৰিব, লগতে প্ৰসৱৰ পূৰ্বে যত্ন, প্ৰতিষেধক, পুষ্টি, ঋতুস্ৰাৱৰ পৰিষ্কাৰ-পৰিচ্ছন্নতা, জীৱনশৈলী আৰু মানসিক স্বাস্থ্য সজাগতামূলক কাৰ্য্যকলাপৰ জৰিয়তে মাতৃ, শিশু আৰু কিশোৰ-কিশোৰীৰ স্বাস্থ্যক প্ৰসাৰিত কৰিব। একেসময়তে এই অভিযানে মেদবহুলতা প্ৰতিৰোধ, উন্নত পুষ্টি, আৰু স্বেচ্ছামূলক ৰক্তদানৰ ওপৰত বিশেষ গুৰুত্ব আৰোপ কৰি সুস্থ জীৱনশৈলীৰ পদ্ধতিৰ দিশত সম্প্ৰদায়সমূহক সংগঠিত কৰিব।