অপকৰ্মৰ অভিযোগত গ্ৰেপ্তাৰ জনপ্ৰিয় অভিনেতা, ভুক্তভোগী যুৱতীৰ সৈতে ইনষ্টাগ্ৰামত চিনাকিৰ পৰা হাউছ পাৰ্টিলৈ

 

দিল্লী আৰক্ষীয়ে পুনেৰ পৰা গ্ৰেপ্তাৰ কৰিছে টেলিভিছন ধাৰাবাহিকৰ অভিনেতা আশিস কাপুৰক। অভিনেতাগৰাকীৰ বিৰুদ্ধে এগৰাকী মহিলাই ধৰ্ষণৰ গুৰুতৰ অভিযোগ উত্থাপন কৰিছে। আগষ্ট মাহৰ দ্বিতীয় সপ্তাহত দিল্লীত অনুষ্ঠিত হাউচ পাৰ্টিৰ সময়ত আশিস কাপুৰে মহিলাগৰাকীক ধৰ্ষণ কৰিছিল বুলি অভিযোগ উত্থাপন কৰিছে। এই গোচৰ পোহৰলৈ অহাৰ পিছত টেলিভিছন উদ্যোগত চাঞ্চল্যৰ সৃষ্টি হৈছে। সম্প্ৰতি সমগ্ৰ ঘটনাৰ তদন্ত অব্যাহত ৰাখিছে দিল্লী আৰক্ষীয়ে। টেলিভিছন ধাৰাবাহিকত কাম কৰা আশিস কাপুৰ সৰু পৰ্দাৰ অভিনেতা হিচাপে জনপ্ৰিয়। আশিস কাপুৰক গ্ৰেপ্তাৰৰ পিছতে মনোৰঞ্জন জগতত চাঞ্চল্যৰ সৃষ্টি হৈছে। ছচিয়েল মিডিয়াতো বিভিন্ন ধৰণৰ প্ৰতিক্ৰিয়া ব্যক্ত কৰিছে নেটিজেনে।

দিল্লী আৰক্ষীৰ তথ্য অনুসৰি, ছ’চিয়েল মিডিয়া প্লেটফৰ্ম ইনষ্টাগ্ৰামত ভুক্তভোগী মহিলা আৰু জনপ্ৰিয় ধাৰাবাহিক ‘সাথ ফেৰে’ৰ জনপ্ৰিয় অভিনেতা আশিস কাপুৰৰ চিনাকি হয়। কিছুদিন বাৰ্তালাপ কৰাৰ পিছত তেওঁলোকৰ মাজত বন্ধুত্ব গাঢ় হৈ পৰে আৰু তাৰ পিছতে তেওঁলোকে ইজনে সিজনক লগ কৰে। যোৱা আগষ্ট মাহৰ দ্বিতীয় সপ্তাহত দিল্লীৰ এটা ঘৰত পাৰ্টিৰ আয়োজন কৰা হয়। বন্ধু-বান্ধৱীৰ সৈতে এই পাৰ্টিত উপস্থিত আছিল আশিস কাপুৰ।

এজাহাৰত লিপিবদ্ধ হোৱা বিবৃতি অনুসৰি পাৰ্টিৰ সময়ত ভুক্তভোগী ৱাশ্বৰূমলৈ গৈছিল, য’ত ইতিপূৰ্বে অভিযুক্ত আশিস কাপুৰ উপস্থিত আছিল। তাতেই অভিনেতা আশিসে ভুক্তভোগী মহিলাগৰাকীক ধৰ্ষণ কৰাৰ অভিযোগ উত্থাপন কৰিছে। আনকি এই কাণ্ডৰ সময়ত ভিডিঅ’গ্ৰাফীও কৰা হৈছিল বুলি ভুক্তভোগীয়ে দাবী কৰিছে যদিও এতিয়ালৈকে আৰক্ষীয়ে এনে কোনো ভিডিঅ’ প্ৰমাণ লাভ কৰা নাই।