অসমৰ আঞ্চলিকতাবাদী দল অসম গণ পৰিষদে ১৪ অক্টোবৰত ৪০সংখ্যক প্ৰতিষ্ঠা দিৱস উদযাপন কৰিব। ডিব্ৰুগড় জিলাৰ জেৰাইত কেন্দ্ৰীয়ভাৱে অনুষ্ঠানটি অনুষ্ঠিত হোৱাৰ লগতে প্ৰতিটো বিধানসভা সমষ্টিত প্ৰতিষ্ঠা দিৱস উদযাপন কৰাৰ সিদ্ধান্ত গ্ৰহণ কৰে। মঙলবাৰে গুৱাহাটীৰ আমবাৰীস্থিত দলৰ মুখ্য কাৰ্যালয়ত অগপৰ এখন কেন্দ্ৰীয় কাৰ্যনিৰ্বাহক সভা অনুষ্ঠিত হয়৷ এই সভাত অংশগ্ৰহণ কৰি অগপৰ সভাপতি তথা অসম অসম চৰকাৰৰ মন্ত্ৰী অতুল বৰাই আগন্তুক প্ৰতিষ্ঠা দিৱসৰ বিভিন্ন কাৰ্যসূচীৰ প্ৰস্তুতিৰ বিষয়ে সভাত বিতংভাৱে আলোচনা কৰে৷
লগতে দলে আয়োজন কৰিবলগীয়া বিধানসভা সমষ্টি ভিত্তিত কৰ্মশালা, ব্যাপক সদস্যভৰ্তি-সদস্য নৱীকৰণ অভিযান, আঞ্চলিক দলৰ সন্মিলন, আগন্তুক অসম বিধানসভাৰ উপ-নিৰ্বাচন, পঞ্চায়ত, মিচিং স্বায়ত্তশাসিত পৰিষদৰ নিৰ্বাচনকে ধৰি অন্যান্য স্বায়ত্তশাসিত পৰিষদৰ নিৰ্বাচন আৰু দলীয় সাংগঠনিক দিশৰ বিভিন্ন বিষয়তো আলোচনা কৰা হয়৷
সভাত অগপৰ কাৰ্যকৰী সভাপতি তথা মন্ত্ৰী কেশৱ মহন্ত, লোকসভাৰ সাংসদ ফণীভূষণ চৌধুৰী, ৰাজ্যসভাৰ সাংসদ বীৰেন্দ্ৰপ্ৰসাদ বৈশ্যৰ লগতে কেন্দ্ৰীয় সমিতিৰ উপ-সভাপতিসকল, সাধাৰণ সম্পাদকসকল, কেন্দ্ৰীয় সমিতিৰ সদস্য-সদস্যা, জিলা সভাপতিসকল, ভাতৃ-ভগ্নী সংগঠনসমূহৰ সভাপতি তথা অন্যান্য বিষয়ববীয়াসকল উপস্থিত থাকে।