শিলচৰৰ হাইলাকান্দি ৰোডৰ মদনমোহন পাৰ্ক এলেকাৰ নিবাসী পিংকি ৰায় (১৮)ৰ দগ্ধ মৃতদেহটো মঙলবাৰে ধোৱাৰবন্দৰ এটা নিৰ্মীয়মান অট্টালিকাৰ পৰা উদ্ধাৰ কৰা হয় । হত্যাকাণ্ডৰ পিছত মৃতদেহটো জ্বলাই দিয়া হৈছিল যাতে কোনেও ছোৱালীজনীক চিনি নাপায় । ইফালে এই ভয়াবহ ঘটনাই সমগ্ৰ শিলচৰ চহৰত উত্তেজনা বিয়পাইছে ।
যুৱতীগৰাকীৰ মৃত্যুৰ লগত জড়িত দোষীক গ্ৰেপ্তাৰ কৰাৰ দাবীত সচেতন মহলে তীব্ৰ প্ৰতিবাদ সাব্যস্ত কৰে । আৰক্ষী প্ৰশাসনৰ ব্যৰ্থতাক লৈও প্ৰশ্ন উত্থাপন হৈছে । এই ঘটনাৰ লগত জড়িত যুৱতীগৰাকীৰ প্ৰেমিকক সন্দেহৰ আওতালৈ অনাৰ খবৰ আহিছে যদিও আৰক্ষীয়ে এতিয়ালৈকে কোনো লোকক গ্ৰেপ্তাৰ কৰা নাই ।
কাছাৰ- কৰিমগঞ্জ-হাইলাকান্দি ছাত্ৰ সন্থাই ( আকছা) আগন্তুক ৭২ ঘণ্টাৰ ভিতৰত এই ঘটনাৰ লগত জড়িত অপৰাধীক গ্ৰেপ্তাৰ কৰাৰ লগতে ঘটনাটো কেনেদৰে সংঘটিত হৈছিল সেই তথ্য পোহৰলৈ অনাৰ দাবী জনাইছে । ৭২ ঘণ্টাৰ ভিতৰত আৰক্ষীয়ে হত্যাকাৰীক গ্ৰেপ্তাৰ নকৰিলে আন্দোলনৰ হুংকাৰ দিছে সংগঠনটোৱে ।
শিলচৰত মহিলাৰ নিৰাপত্তাৰ ব্যৱস্থাক লৈ প্ৰশ্ন উত্থাপন কৰিছে আকছাৰ সদস্যসকলে । বুধবাৰে শিলচৰ প্ৰেছ ক্লাবত আয়োজিত এক সংবাদমেলত আকছাৰ আহ্বায়ক মধুমিতা দেই কয়, ‘শিলচৰ চহৰত মহিলাৰ সুৰক্ষাৰ ক্ষেত্ৰত অনিশ্চয়তাৰ সৃষ্টি হৈছে ।
পিংকি ৰায়ৰ লগত যিটো হ’ল সেয়া অতি দুখজনক । এই চহৰৰ নাৰী এতিয়া নিৰাপদ নহয় । পথৰ বিভিন্ন অঞ্চলত চিচি টিভিৰ সৈতে ভইচ ৰেকৰ্ডাৰ আৰু ষ্ট্ৰীট লাইট স্থাপন কৰিবলৈ আমি দাবী জনাইছো । আমি এই হত্যাকাণ্ডৰ ন্যায় বিচাৰো । আমি দাবী জনাইছো যে কাছাৰ আৰক্ষী প্ৰশাসনে জৰুৰী ব্যৱস্থা গ্ৰহণ কৰি অপৰাধীক গ্ৰেপ্তাৰ কৰক ।
এনকাউন্টাৰ কৰক । তেনে অপৰাধীক এনকাউন্টাৰ কৰিলেই যুৱতীগৰাকীয়ে ন্যায় পাব । লগতে মুখ্যমন্ত্ৰী ড° হিমন্তবিশ্ব শৰ্মাক এই বিষয়ত হস্তক্ষেপ কৰিবলৈ অনুৰোধ জনাইছো । জয়শ্ৰী নাথে কয়, ‘বেটি বচাও বেটি পঢ়াও শ্লোগান দিয়া হৈছে কিন্তু বাস্তৱত ইয়াৰ বিপৰীতহে হৈছে । আমি বিচাৰো দোষীক শীঘ্ৰে গ্ৰেপ্তাৰ কৰক । লাগিলে সেই অপৰাধীৰ ঘৰ বুলডজাৰেৰে ভাঙি পেলাওক ৷’ সংগঠনটোৰ আন এগৰাকী সদস্য আফছানা চৌদিয়ালেও একে দাবী উত্থাপন কৰে ।
আকছাৰ উপদেষ্টা ৰূপম নন্দী পুৰকায়স্থই কয় নিখোজ সংক্ৰান্তত গোচৰ ৰুজু কৰাৰ পিছতো ৰাংগিৰখাৰি আৰক্ষীয়ে পিংকি ৰায়ক উদ্ধাৰ কৰাত ব্যৰ্থ হয় । তেওঁলোকে সক্ৰিয়ভাৱে কাম কৰা হ’লে আজি যুৱতীগৰাকীক জীৱিত অৱস্থাত উদ্ধাৰ কৰিব পৰা গ’লহেঁতেন । তেওঁলোকৰ ব্যৰ্থতা পোহৰলৈ আহিছে ৷ সেই কাৰণে ৰাংগিৰখাৰি পুলিচ ইনচাৰ্জক অপসাৰিত কৰি তেওঁৰ বিৰুদ্ধে গোচৰ ৰুজু কৰা হওক ।
আৰক্ষীয়ে বাৰ্মিজ চুপাৰি ধৰিব পাৰে যদিও মহিলাক সুৰক্ষা দিয়াত সম্পূৰ্ণৰূপে ব্যৰ্থ হৈছে । লগতে তেওঁ কয় যে আগন্তুক ৭২ ঘণ্টাৰ ভিতৰত তদন্ত কৰি সঠিক কাৰণ আৰু কিয় এই যুৱতীগৰাকীৰ লগত এনে ঘটনা সংঘটিত হৈছে সেই কথা উদঙাই দিব লাগিব । যুৱতীগৰাকী নিৰুদ্দেশ হোৱাৰ গোচৰ ৰুজু কৰাৰ পিছত শিলচৰৰ বিধায়ক দ্বীপায়ণ চক্ৰৱৰ্তীৰ কাষ চাপিছিল পৰিয়ালৰ সদস্যসকল ৷কিন্তু কোনো সহাৰি নাপালে ।বিধায়কগৰাকী অলপ সক্ৰিয় হ’লে আৰক্ষীক হেঁচা প্ৰয়োগ কৰি নিৰুদ্দেশ হোৱা ঘটনাৰ তদন্ত কৰিব পাৰিলেহেঁতেন । কিন্তু সেই পৰিয়ালটোক কোনো ধৰণে সহায় নকৰিলে বিধায়কজনে, সহায় নকৰিলে আৰক্ষী প্ৰশাসনে ।