সমষ্টি পুনৰ নিৰ্ধাৰণে দপদপনি হ্ৰাস কৰিছে নেকি চাহ জনগোষ্ঠীৰ? পূৰ্বৰ তুলনাত ৫সমষ্টিত হ্ৰাস পালে নেকি চাহ জনগোষ্ঠীৰ প্ৰতিপত্তি? বহু ৰাজনৈতিক নেতাৰ ভৱিষ্যত অন্ধকাৰ কৰিলে সমষ্টি পুনৰ নিৰ্ধাৰণে ৷ চাহ জনগোষ্ঠীৰ ওপৰত সমষ্টি পুনৰ নিৰ্ধাৰণৰ প্ৰভাৱক লৈ চলি আছে প্ৰতিক্ৰিয়া ৷
দেশৰ নিৰ্বাচন আয়োগে প্ৰকাশ কৰা সমষ্টি পুনৰ নিৰ্ধাৰনৰ খচৰাক লৈ ইতিমধ্যেই ক্ষোভ আৰু অসন্তুষ্টি বৃদ্ধি পাইছে ৰাজ্যৰ বিভিন্ন জাতি জনগোষ্ঠীৰ মাজত৷ আটছা,আছায়ো সমষ্টি পুনৰ নিৰ্ধাৰণৰ জৰিয়তে চাহ জনগোষ্ঠীক ৰাজনৈতিকভাৱে শোষিত হোৱাৰ অভিযোগ তুলি প্ৰতিবাদ কৰিছে, নিৰ্বাচন আয়োগকো দিছে অভিযোগ ৷ সমষ্টি পুনৰ নিৰ্ধাৰণেৰে লাহোৱাল, বিহালীত চাহ জনগোষ্ঠীৰ ৰাজনৈতিক প্ৰতিপত্তি শেষ ৷ দীৰ্ঘসময় ধৰি লাহোৱালক প্ৰতিনিধিত্ব কৰিছিল পৃথ্বী মাঝিয়ে ৷ বিহালীৰ পৰা দুবাৰকৈ জয়ী হৈছিল অসম বিজেপিৰ বৰ্তমানৰ শক্তিশালী নেতা পল্লৱ লোচন দাস ৷ সমষ্টি পুনৰ নিৰ্ধাৰণে লাহোৱালক বিলুপ্তি কৰা আৰু বিহালীক সংৰক্ষিত কৰাত দুয়োটা সমষ্টিত জনগোষ্ঠীটোৱে ৰাজনৈতিক অধিকাৰ কাললৈ হেৰুৱালে ৷ যাক লৈ বাৰুকৈয়ে অসন্তুষ্ট আটছা ৷ ক্ষুব্ধ কাষ ছাপিছে নিৰ্বাচন আয়োগৰ ৷
আনহাতে তিনিটা সমষ্টি ডিগবৈ,সৰুপথাৰ আৰু ঢেকিয়াজুলিত কমিল চাহ জনগোষ্ঠীৰ ভোটাৰ ৷ চাহ জনগোষ্ঠীৰ ভোটাৰ হ্ৰাস পোৱাত সমষ্টি তিনিটাত চাহ জনগোষ্ঠীৰ নেতা জয়ী হৈ অহাৰ সম্ভাৱনা হ্ৰাস পালে৷ পূৰ্বতে এই তিনিটা সমষ্টিত ৰামেশ্বৰ ধানোৱাৰ, আকলিয়াছ তিৰ্কিৰ দৰে নেতা জয়ী হৈ আহিছিল ৷ জয়ী হৈছিল বিনোদ গোৱালা, যোছেফ তপ্নৰ দৰে নেতা ৷ এতিয়া সেই সম্ভাৱনা হ্ৰাস পাই আহিল৷"এনেকৈ আমাৰ প্ৰতিপত্তি শেষ কৰিবলৈ বিচৰাৰ দৰে অনুভৱ হৈছে ৷ আমাৰ জনগোষ্ঠীটোৰ যি ৰাজনৈতিক অধিকাৰ সেই ৰাজনৈতিক অধিকাৰ আমি লাহে লাহে যেন হেৰুৱাই পেলাইছোঁ ৷ কিন্তু আমি এনে হ’বলৈ দিব নোৱাৰোঁ ৷ সেই কথা স্পষ্ট ৷ আমাক আমাৰ অধিকাৰ লাগিব ৷" —ধীৰাজ গোৱালা, আটছা
ইয়াৰ উপৰিও মৰিয়নি,ৰঙাপাৰাৰ দৰে সমষ্টিতো হ্ৰাস পাইছে চাহ জনগোষ্ঠীৰ ভোটাৰ ৷ যদিও কৈ থকা হৈছে যে সমষ্টি পুনৰ নিৰ্ধাৰণে সকলোকে সুৰক্ষিত কৰিছে ঠিক সেইসময়ত এনে ধৰণৰ তথ্য আৰু অভিযোগে বেলেগ বাৰ্তাহে কঢ়িয়াই আনে ৷