সুলভ হৈছে ৰন্ধন গেছ চিলিণ্ডাৰ; বাণিজ্যিক এলপিজিৰ মূল্য প্ৰতি চিলিণ্ডাৰত ১৭২ টকা হ্ৰাস

 

ভাৰতত বাণিজ্যিক এলপিজিৰ মূল্য হ্ৰাস হৈছে। দেশৰ ৪ খন মহানগৰত বাণিজ্যিক এলপিজিৰ মূল্য ১৭১.৫০ টকা হ্ৰাস পাইছে। আজি অৰ্থাৎ ১ মে’ৰ পৰা ই কাৰ্যকৰী হ’ব। তেল বিপণন কোম্পানী ইণ্ডিয়ান অইলৰ ৱেবছাইটত এই নতুন মূল্যৰ তালিকাখন প্ৰকাশ কৰা হৈছে।

দিল্লীত এটা ১৯ কিলোগ্ৰাম গেছ চিলিণ্ডাৰৰ মূল্য ২,০২৮ টকাৰ পৰিৱৰ্তে এতিয়াৰে পৰা ১,৮৫৬.৫০ টকাত উপলব্ধ হ’ব। কলকাতাত এই চিলিণ্ডাৰ ২,১৩২ টকাৰ পৰিৱৰ্তে ১,৯৬০.৫০ টকাত আৰু মুম্বাইত ১,৯৮০ টকাৰ পৰিৱৰ্তে ১,৮০৮.৫০ টকাত গ্ৰাহকে ক্ৰয় কৰিব পাৰিব। চেন্নাইত বাণিজ্যিক এলপিজি এতিয়া ২,০২১.৫০ টকাত উপলব্ধ হ’ব যাৰ মূল্য আগতে ২,১৯২.৫০ টকা আছিল। আজিৰে পৰা পাটনাত বাণিজ্যিক এলপিজিৰ মূল্য ২,১২২ টকা।

এপ্ৰিল মাহতো বাণিজ্যিক এলপিজিৰ মূল্য হ্ৰাস কৰা হৈছিল। ১ এপ্ৰিলত বাণিজ্যিক এলপিজি ৯২ টকা হ্ৰাস পাইছিল। কিন্তু ১ মাৰ্চত ইয়াৰ মূল্য ৩৫০ টকা বৃদ্ধি কৰা হৈছিল।

মন কৰিবলগীয়া যে, বাৰ্ষিক ভিত্তিত দিল্লীত বাণিজ্যিক এলপিজিৰ মূল্য এতিয়ালৈকে প্ৰায় ৫০০ টকা হ্ৰাস কৰা হৈছে। ২০২২ চনৰ মে মাহত, বাণিজ্যিক এলপিজিৰ মূল্য ২,৩৫৫.৫০ টকা আছিল।

ঘৰুৱা এলপিজি

আনহাতে, ঘৰত ব্যৱহৃত এলপিজিৰ মূল্যত কোনো পৰিৱৰ্তন হোৱা নাই। ঘৰুৱা ৰন্ধৰ গেছৰ মূল্য প্ৰতি চিলিণ্ডাৰত দিল্লীত ১,১০৩ টকা, মুম্বাইত ১,১১২.৫ টকা, কলকাতাত ১,১২৯ টকা, চেন্নাইত ১,১১৮.৫০ টকা আৰু পাটনাত ১,২০১ টকা। ঘৰুৱা এলপিজিৰ মূল্য ১ মাৰ্চ, ২০২৩ তাৰিখে সলনি কৰি ৫০ টকা হ্ৰাস কৰা হৈছিল।

মূল্য কেনেদৰে নিৰ্ধাৰণ কৰা হয়–

উল্লেখনীয় যে, এলপিজিৰ মূল্য প্ৰতি মাহে পুনৰীক্ষণ কৰা হয়। ইয়াৰ মূল্য আমদানি সমতা মূল্যৰ (IPP) সূত্ৰৰ দ্বাৰা নিৰ্ধাৰণ কৰা হয়। ভাৰতত এলপিজি বেছিভাগ আমদানিৰ ওপৰত নিৰ্ভৰশীল, সেয়েহে গেছৰ আন্তৰ্জাতিক মূল্যই ইয়াৰ ওপৰত ডাঙৰ প্ৰভাৱ পেলায়। এলপিজিৰ কেঁচা সামগ্ৰী হৈছে খাৰুৱা তেল, সেয়েহে খাৰুৱা তেলৰ মূল্যেও ইয়াৰ ওপৰত যথেষ্ট প্ৰভাৱ পেলায়। চৌদি আৰামকোৰ এলপিজি মূল্যই হৈছে ভাৰতত এলপিজি গেছৰ বেঞ্চমাৰ্ক। গেছৰ মূল্যত FOB, পৰিবহন, বীমা, শুল্ক আৰু দেয় পোৰ্ট অন্তৰ্ভুক্ত থাকে।