জনপ্ৰিয় অভিনেতা চেইফ আলী খানক বলীউডৰ সুন্দৰ আৰু আকৰ্ষণীয় অভিনেতাসকলৰ মাজত গণ্য কৰা হয়। চেইফ আলী খানৰ জন্ম ১৯৭০ চনৰ ১৬ আগষ্টত নতুন দিল্লীত হৈছিল। বৰ্তমান তেওঁৰ বয়স ৫২ বছৰ। হায়দৰাবাদৰ নবাব পৰিয়ালৰ চেইফৰ দেউতাক মনচুৰ আলী খান পাটাউদি ভাৰতৰ এজন বিখ্যাত ক্ৰিকেটাৰ আছিল। তেওঁৰ মাক শৰ্মিলা ঠাকুৰ ভাৰতৰ চিনেমা জগতৰ এগৰাকী প্ৰখ্যাত অভিনেত্ৰী। তেওঁ বলীউডৰ এসময়ৰ আগশাৰীৰ অভিনেত্ৰী আছিল। তেওঁৰ ভগ্নী ছোহা আলী খানো এগৰাকী অভিনেত্ৰী আৰু চাবা আলী খান এগৰাকী ফেশ্বন ডিজাইনাৰ।
চেইফ আলী খানে কিতাপ পঢ়ি বৰ ভাল পায়। তেওঁৰ পত্নী কৰীণা কাপুৰ খানে প্ৰায়ে তেওঁলোকৰ ঘৰৰ পুথিভঁৰালৰ ফটো শ্বেয়াৰ কৰা দেখা পোৱা যায়। চেইফ আলী খানে হিমাচল প্ৰদেশৰ চিমলাৰ ওচৰৰ চানাৱাৰৰ লৰেন্স স্কুলত অধ্যয়ন কৰিছিল যি দেশৰ এখন বিখ্যাত ব্যক্তিগত বৰ্ডিং স্কুল। ইয়াৰ পিছত তেওঁ যুক্তৰাজ্যৰ হাৰ্টফৰ্ডশ্বায়াৰত অৱস্থিত লকাৰপাৰ্ক স্কুলতো অধ্যয়ন কৰিছে। চেইফে উইনচেষ্টাৰ কলেজৰ পৰা স্নাতক ডিগ্ৰী লাভ কৰিছিল।
চেইফ আলী খানে ১৯৯৩ চনত 'পৰম্পৰা' চলচ্চিত্ৰৰ জৰিয়তে বলীউডত আত্মপ্ৰকাশ কৰিছিল। তেওঁ ১৯৯৪ চনত মুক্তি লাভ কৰা 'ইয়ে দিল্লাগী' আৰু 'মে খিলাড়ী টু আনাৰী' চলচ্চিত্ৰৰ পৰা জনপ্ৰিয়তা লাভ কৰিছিল। চেইফে ২০০৯ চনত তেওঁৰ প্ৰযোজনা গৃহ 'ইলুমিনাটি' আৰম্ভ কৰিছিল। তেওঁৰ গৃহ নিৰ্মাণৰ প্ৰথম চলচ্চিত্ৰ আছিল 'লাভ আজ কাল'। চেইফে চলচ্চিত্ৰ মিৰ্মাণ কৰাৰ লগতে এই ছবিখনত এজন অভিনেতা হিচাপেও কাম কৰিছিল।
চেইফ আলী খানে দুবাৰকৈ বিয়া কৰাইছে। ১৯৯১ চনত সেই সময়ৰ বলীউডৰ জনপ্ৰিয় অভিনেত্ৰী অমৃতা সিঙক বিয়া কৰায়। তেওঁলোকৰ দুটা সন্তান আছে - চাৰা আলী খান আৰু ইব্ৰাহিম আলী খান। উল্লেখ্য যে, চেইফ আৰু অমৃতাৰ সম্পৰ্ক বেছি দিন স্থায়ী নহ'ল আৰু দম্পতীহালৰ ২০০৪ চনত বিবাহ বিচ্ছেদ হৈছিল। বহু বছৰ ধৰি অভিনেত্ৰী কৰীণা কাপুৰৰ সৈতে ডেটিং কৰাৰ পিছত দুয়োৱে ২০১২ চনত বিবাহপাশত আৱদ্ধ হয়। তেওঁলোকৰ দুটা পুত্ৰ সন্তান আছে- টাইমুৰ আলী খান আৰু জেহ আলী খান।২০১১ চনৰ ২২ ছেপ্টেম্বৰত চেইফ আলী খানক পাটাউদি পৰিয়ালৰ একমাত্ৰ উত্তৰাধিকাৰী হিচাপে মুকুট পিন্ধোৱা হৈছিল। সেই সময়ত তেওঁক পাটাউদিৰ দশম নৱাব হিচাপে সন্মানিত কৰা হৈছিল। চেইফৰ পৈতৃক ঘৰ 'পাটাউদি পেলেচ' গুৰগাঁও চহৰৰ পৰা ২৫ কিলোমিটাৰ দূৰত অৱস্থিত। 'মঙ্গল পাণ্ডে', 'বীৰ জাৰা', 'ৰং দে বাসন্তী', আৰু 'ইট প্ৰে লাভ'ৰ দৰে চলচ্চিত্ৰৰ দৃশ্যগ্ৰহণ এই মহলতে কৰা হৈছে। চেইফ আৰু কৰীণাই প্ৰায়ে তেওঁলোকৰ পৰিয়ালৰ সৈতে তাত বন্ধৰ দিনবোৰ অতিবাহিত কৰে।