চৰ্ত সাপেক্ষে দলৰ মজিয়াত বিধায়ক শ্বেৰমান আলি আহমেদ থাকিব লাগিব বুলি কংগ্ৰেছে ঘোষণা কৰাৰ পিছত দল এৰিবলৈ সাজু হোৱা শ্বেৰমানক লৈ শুকুৰবাৰে বিশেষ মন্তব্য কৰে বিৰোধী দলপতি দেৱব্ৰত শইকীয়াই ৷ লগতে শ্বেৰমানৰ বাবে দুৱাৰ খোলা আছে বুলি ঘোষণা কৰে AIUDFয়ে ৷ ইপিনে বৰাকৰ কোনো কংগ্ৰেছ তথা AIUDFৰ বিধায়কে BJPত যোগ দিয়াৰ সম্ভাৱনা নাই বুলি শিলচৰত সদৰি কৰিলে মুখ্যমন্ত্ৰী ড° হিমন্ত বিশ্ব শৰ্মাই ৷
"শাসকীয় BJPলৈ বিৰোধীৰ আৰু কোন কোন বিধায়ক যাব?”-- শেহতীয়াকৈ এনেবোৰ প্ৰশ্নই ৰাজ্যৰ ৰাজনীতিত তোলাপাৰ লগাইছে ৷ বিৰোধী কংগ্ৰেছ অথবা AIUDF, কিম্বা BPFৰ বিধায়কে শাসকীয় BJPত যোগ দিয়াৰ সম্ভাৱনাৰ সন্দৰ্ভত সততে চলা আলোচনাৰ মাজতে শুকুৰবাৰে শিলচৰত মুখ্যমন্ত্ৰী ড° হিমন্ত বিশ্ব শৰ্মাই কৰিলে এক বিশেষ মন্তব্য ৷ মুখ্যমন্ত্ৰী ড° শৰ্মাই ক'লে- “বৰাকৰ কোনো কংগ্ৰেছ-AIUDFৰ বিধায়কে BJPত যোগ দিয়াৰ সম্ভৱনা নাই ৷ BJPত যোগ নিদিলেও BJPৰ সৈতে থাকিব বন্ধু হিচাপত ৷”ইপিনে দলত থাকিবলৈ হ'লে সংখ্যালঘুৰ হৈ মাত মাতিব নোৱাৰিব বুলি হেনো কংগ্ৰেছে চৰ্ত আৰোপ কৰিছে বিধায়ক শ্বেৰমান আলি আহমেদক ৷ কিন্তু কংগ্ৰেছৰ চৰ্ত মানিবলৈ প্ৰস্তুত নহয় দলৰ পৰা নিলম্বিত হৈ থকা শ্বেৰমান ৷
শ্বেৰমান আলি আহমেদৰ এই দাবী সন্দৰ্ভত শুকুৰবাৰে বিৰোধী দলপতি দেৱব্ৰত শইকীয়াই দিলে বিশেষ ইংগিত ৷ শইকীয়াই ক'লে- ”দলীয় নীতি-নিৰ্দেশ অমান্য দলৰ মজিয়াত কোনো কৰিব নোৱাৰিব ৷”
বিধায়ক শ্বেৰমানে কংগ্ৰেছ এৰি ক'লৈ যাব? ইতিমধ্যে পুৰণি ঘৰ AIUDFলৈ উভতি যোৱাৰ বাবে প্ৰস্তুতি চলাইছে বাঘবৰৰ বিধায়ক শ্বেৰমানে ৷ এই সন্দৰ্ভত AIUDFৰ জেষ্ঠ বিধায়ক ড° হাফিজ ৰফিকুল ইছলামে দিলে সেউজ সংকেত ৷ ড° ইছলামে ক'লে- “কেৱল শ্বেৰমানৰ বাবেই নহয়, AIUDFৰ দুৱাৰ সকলোৰে বাবে খোলা আছে ৷ সংখ্যালঘুৰ হৈ মাত মাতিব নোৱাৰিব বুলি কংগ্ৰেছৰ দৰে পুৰণি দলে চৰ্ত আৰোপ কৰাতো অতি দুৰ্ভাগ্যজনক ৷”