আজি অসমৰ মুখ্যমন্ত্ৰী হিমন্ত বিশ্ব শৰ্মা চৰকাৰৰ দ্বিতীয় বৰ্ষপূৰ্তি। মঙলবাৰে এই উপলক্ষে পৰৱৰ্তী বৰ্ষত তেওঁ কৰিবলগীয়া কেইবাটাও গুৰুত্বপূৰ্ণ কাৰ্যসূচীৰ বিষয়ে ঘোষণা কৰে।
অসমৰ মুখ্যমন্ত্ৰী শৰ্মাই কয় যে তেওঁৰ চৰকাৰে বহুবিবাহৰ ওপৰত নিষেধাজ্ঞা আৰোপ কৰাটো সম্ভৱ হয় নে সেই বিষয়ে অধ্যয়ন কৰিব। চৰকাৰে এই বিষয়ত আইনী দিশবোৰ অন্বেষণ কৰিবলৈ এখন বিশেষজ্ঞ সমিতি গঠন কৰাৰো সিদ্ধান্ত লৈছে। বিশেষজ্ঞ সমিতিখনে অসমত বহুবিবাহ নিষিদ্ধ কৰাৰ সিদ্ধান্ত লোৱাৰ অধিকাৰ ৰাজ্য চৰকাৰৰ আছে নে সেইটো অনুসন্ধান কৰিব।
মুখ্যমন্ত্ৰীয়ে এক টুইটযোগে কয় যে, অসম চৰকাৰে এখন বিশেষজ্ঞ সমিতি গঠন কৰাৰ সিদ্ধান্ত লৈছে যিয়ে ৰাজ্যখনত বহুবিবাহ নিষিদ্ধ কৰাৰ বাবে ৰাজ্যিক আইনসভাক ক্ষমতা প্ৰদান কৰা হৈছে নে নাই সেই বিষয়ে পৰীক্ষা কৰিব। সমিতিখনে মুছলিম ব্যক্তিগত আইন (চৰিয়াত) আইন, ১৯৩৭ৰ বিধানসমূহক ভাৰতৰ সংবিধানৰ ২৫ নং অনুচ্ছেদৰ সৈতে পৰীক্ষা কৰিব আৰু ৰাজ্যিক নীতিৰ নিৰ্দেশনা মূলক নীতিসমূহৰ সৈতেও তুলনা কৰিব।’’তেওঁ লগতে কয় যে, ‘‘সমিতিখনে এক সু-অৱগত সিদ্ধান্তত উপনীত হ’বলৈ আইন বিশেষজ্ঞকে ধৰি সকলো অংশীদাৰৰ সৈতে বিস্তৃত আলোচনাত লিপ্ত হ’ব।’’
মুখ্যমন্ত্ৰীয়ে কয় যে, নিষেধাজ্ঞাটো ‘‘আক্ৰমণৰ দ্বাৰা নহয়, সহমতৰ জৰিয়তে’’ প্ৰাপ্ত কৰা হ’ব। এই বছৰৰ আৰম্ভণিতে বাল্য বিবাহৰ বিৰুদ্ধে কঠোৰ পদক্ষেপৰ বাবে অসমৰ মুখ্যমন্ত্ৰী শৰ্মা সমালোচনাৰ সন্মুখীন হৈছিল। তেওঁ কয় যে, ‘‘আমি বুদ্ধিজীৱী, ইছলামী পণ্ডিত, জ্যেষ্ঠসকলৰ সৈতে পৰামৰ্শ কৰিম; সেয়েহে এইটো এক প্ৰৰোচনাৰ পৰিৱৰ্তে এক সৰ্বসন্মত নিৰ্মাণ কাৰ্যকলাপ।’’
শৰ্মাই কয় যে, উক্ত অভিযানৰ সময়ত, কৰ্তৃপক্ষই দেখিছিল যে বহুতো বৃদ্ধ পুৰুষে ‘‘একাধিকবাৰ বিবাহ পাশত আৱদ্ধ’’ হৈছে আৰু প্ৰায়ে নাবালিক ছোৱালীৰ সৈতে বিবাহ কৰাইছে। তেওঁ কয় যে, ‘‘সেয়েহে বাল্য বিবাহৰ বিৰুদ্ধে কঠোৰ পদক্ষেপ একমাত্ৰ সমাধান নহয়, বহুবিবাহ নিষিদ্ধ কৰাটোও গুৰুত্বপূৰ্ণ।’’
উল্লেখ্য যে, উচ্চতম ন্যায়ালয়ে মুছলমানসকলৰ মাজত বহুবিবাহৰ সাংবিধানিক বৈধতা আৰু ‘নিকাহ হালালা’ প্ৰথাক প্ৰত্যাহ্বান জনোৱা আবেদনৰ শুনানিৰ বাবে পাঁচ জনীয়া সংবিধান বিচাৰপীঠ গঠন কৰিব বুলি কৈছিল। ইয়াৰ পিছতেই অসমৰ মুখ্যমন্ত্ৰীয়ে এতিয়া এনে এক পদক্ষেপ লোৱাৰ সিদ্ধান্ত গ্ৰহণ কৰিছে।
উল্লেখনীয় যে, এই বিষয়টোত অধিবক্তা অশ্বিনী উপাধ্যায়ে এটা পিআইএল দাখিল কৰে যাৰ প্ৰতি লক্ষ্য ৰাখি মুখ্য ন্যায়াধীশ ডি ৱাই চন্দ্ৰচূড় আৰু ন্যায়াধীশ পি এছ নৰসিংহক লৈ গঠিত এখন বিচাৰপীঠে কয় যে পূৰ্বৰ সংবিধান বিচাৰপীঠৰ দুজন ন্যায়াধীশ, ন্যায়াধীশ ইন্দিৰা বেনাৰ্জী আৰু ন্যায়াধীশ হেমন্ত গুপ্তাই, অৱসৰ গ্ৰহণ কৰাৰ বাবে এখন নতুন পাঁচ জনীয়া বিচাৰপীঠ গঠন কৰাৰ প্ৰয়োজন আছে।
ভাৰতৰ মুখ্য ন্যায়াধীশে কয় যে, ‘‘পাঁচ জনীয়া বিচাৰপীঠৰ সন্মুখত অতি গুৰুত্বপূৰ্ণ বিষয় আছে যিবোৰ বিচাৰাধীন হৈ আছে। আমি এটা বিচাৰপীঠ গঠন কৰিম আৰু এই বিষয়টো মনত ৰাখিম।’’