লণ্ডনত ভেন গঘৰ বিখ্যাত চিত্ৰকৰ্ম 'চানফ্লাৱাৰছ'লৈ দুগৰাকী যুৱতীয়ে দলিয়ালে বিলাহী চুপ

 জীৱাশ্ম ইন্ধন নিষ্কাশনৰ বিৰুদ্ধে প্ৰতিবাদ কৰা দুগৰাকী জলবায়ু কৰ্মীয়ে শুকুৰবাৰে লণ্ডনৰ নেচনেল গেলেৰীত ভিনচেণ্ট ভেন গঘৰ বিখ্যাত চিত্ৰকৰ্ম ‘ছানফ্লাৱাৰছ’ৰ ওপৰত বিলাহীৰ চুপ নিক্ষেপ কৰে। তাৰ পিছত তেওঁলোকে সংগ্ৰহালয়ৰ দেৱালত আঠা লগাই দিলে।

সংগ্ৰহালয় কৰ্তৃপক্ষই কয়, “ফ্ৰেমটোৰ কিছু সামান্য ক্ষতি হৈছে, কিন্তু ছবিখনৰ কোনো ক্ষতি হোৱা নাই,” লগতে কয় যে “যুৱতী দুগৰাকীক গ্ৰেপ্তাৰ কৰা হৈছে।”

ব্ৰিটেইন চৰকাৰে তেল আৰু গেছত বিনিয়োগ বন্ধ কৰিবলৈ চেষ্টা কৰা ‘জাষ্ট ষ্টপ অইল’ নামৰ এটা গোটৰ অংশীদাৰ আছিল এই কৰ্মীসকল। এই ঘটনাৰ এটা ভিডিঅ’ও ছ’চিয়েল মিডিয়াত প্ৰকাশ কৰে গোটটোৱে।

ইনষ্টাগ্ৰামত জাষ্ট ষ্টপ অইলে কয় যে, “এই গেলেৰীত মানৱীয় সৃষ্টিশীলতা আৰু উজ্জ্বলতা প্ৰদৰ্শিত হৈছে, তথাপিও আমাৰ চৰকাৰে জলবায়ু আৰু জীৱন ধাৰণৰ ব্যয়ৰ সংকটৰ ওপৰত কাৰ্য্যব্যৱস্থা গ্ৰহণ নকৰাৰ ফলত আমাৰ ঐতিহ্য ধ্বংস হৈছে।” "জলবায়ু আৰু সমাজৰ অৱক্ষয়ৰ ফলত হেৰুওৱা লাখ লাখ জীৱন ৰক্ষা নকৰাৰ সময়ত আমি এই চিত্ৰকলাবোৰক কিয় সুৰক্ষিত কৰি আছো?"শিল্পৰ নে জীৱনৰ মূল্য বেছি? ইয়াৰ মূল্য খাদ্যতকৈ বেছি নেকি? ন্যায়তকৈ বেছি নেকি এই মূল্য? আপুনি চিত্ৰখনৰ সুৰক্ষাৰ বাবে বেছি চিন্তিত, নে আমাৰ পৃথিৱী আৰু মানুহৰ সুৰক্ষাৰ বাবে বেছি চিন্তিত?" বেৰত আঠা লগোৱাৰ পিছত এজন কৰ্মীয়ে এনেদৰে কয়। তেল সংকটৰ ব্যয়ৰ অংশ হিচাপে জীৱন ধাৰণৰ খৰচো আছে বুলিও তেওঁ উল্লেখ কৰে।

"লাখ লাখ ভোকাতুৰ পৰিয়ালৰ বাবে ইন্ধন ব্যয়সাধ্য নহয়। এটি টিন চুপ গৰম কৰাৰো সামৰ্থ্য নাই। ইফালে শস্য উৎপাদন হ্ৰাস হৈছে। বাৰিষা, বনজুই, তীব্ৰ খৰাঙত লাখ লাখ লোকৰ মৃত্যু হৈছে। আমি নতুন তেল আৰু গেছ ক্ৰয় কৰিব নোৱাৰো।"। ইয়াৰ বাবে আমি জনা আৰু ভালপোৱা সকলোখিনি ল’ব লাগিব।’ বুলিও মহিলাগৰাকীয়ে লগতে উল্লেখ কৰে।

উল্লেখযোগ্য যে, এই প্ৰতিবাদী কাৰ্যত তেওঁলোকে বিশেষকৈ ভেন গঘৰ চিত্ৰকে কিয় লক্ষ্য কৰি লৈছিল সেয়া এতিয়াও স্পষ্ট হোৱা নাই।