আজি বলীউডৰ জনপ্ৰিয় অভিনেত্ৰী ৰেখাৰ আজি জন্মদিন। ৮০ৰ দশকত বলীউডৰ ছবিজগতত দপদপনি সৃষ্টি কৰা ৰেখাৰ জনপ্ৰিয়তা আজিও পূৰ্বৰ দৰেই বিদ্যমান। চিলভাৰ স্ক্ৰীণত বিভিন্ন চৰিত্ৰৰে মানুহৰ মন জয় কৰা অভিনেত্ৰী ৰেখাই এতিয়াও নিজকে সুন্দৰ কৰি ৰাখিছে।
ৰেখাৰ সম্পূৰ্ণ নাম ভানুৰেখা গণেশন যদিও চলচ্চিত্ৰ জগতত তেওঁ ৰেখা নামেৰে জনাজাত। তেওঁৰ জন্ম ১৯৫৪ চনৰ ১০ অক্টোবৰ তাৰিখে তামিলনাডুৰ চেন্নাইত হৈছিল।ৰেখাৰ দেউতাক জেমিনি গণেশন এগৰাকী তামিল অভিনেতা আৰু মাতৃ পুষ্পৱল্লী এগৰাকী তেলেগু অভিনেত্ৰী আছিল। সেইকাৰণেই ৰেখাই সৰুৰে পৰা চিনেমা জগতখনৰ প্ৰতি আকৰ্ষিত হৈছিল। ৰেখাই মাত্ৰ ১৫ বছৰ বয়সতে ছবিজগতত কাম কৰা আৰম্ভ কৰিছিল।ৰেখাৰ ব্যক্তিগত জীৱনৰ বিষয়ে ক'বলৈ গ'লে, তেওঁ যথেষ্ট ৰহস্যময়ী। কোৱা হয় যে তেওঁ চিনেমাৰ সংগী অভিনেতা বিনোদ মেহৰাৰ সৈতে প্ৰেমত পৰিছিল। দুয়োৰে বিয়াও হৈছিল কিন্তু বিনোদৰ মাতৃয়ে তেওঁলোকৰ সম্পৰ্কটোক অনুমোদন দিয়া নাছিল।