পহিলা ব’হাগৰ দিনটোত বৰপেটা সত্ৰত ভক্তৰ ভিৰ, পুৱাৰ প্ৰসংগৰ পিছতে হ’ব বৰ্ষফল গণনা

 

অসমৰ বাপোতিসাহোন ৰঙালী বিহুটি ৰাজ্যবাসীয়ে আনন্দ উলাহেৰে পালন কৰাৰ সময়তে বৰপেটাতো সম্পূৰ্ণ সত্ৰীয়া পৰম্পৰা আৰু ৰীতি–নীতিৰে পালন কৰা হৈছে ব’হাগ বিহু৷ বৰপেটাৰ বিহু মূলতঃ সত্ৰকেন্দ্ৰীক৷ বৰপেটাত ৰঙালী বিহুৰ ঢোল–পেঁপা–গগনা, বিহু নামৰ পৰিৱৰ্তে সম্পূৰ্ণ সত্ৰীয়া ৰীতিৰে পালন কৰা হয় ব’হাগ বিহু৷

চ’তৰ সংক্ৰান্তিৰ পৰা সাতদিন জুৰি পালন কৰা ব’হাগ বিহুষ। আজি পহিলা ব’হাগৰ দিনটোত বৰপেটা সত্ৰত পালন কৰা হৈছে বৰ দোমাহি৷ বৰ দোমাহি উপলক্ষে সত্ৰত সেৱা জনাবলৈ সত্ৰবাসী ভক্তপ্ৰাণ লোকসকল আহি সত্ৰত ভিৰ কৰিছে৷ বৰ দোমাহি উপলক্ষে সত্ৰত পুৱা নাম–প্ৰসংগৰ পিছত সত্ৰৰ গায়ন–বায়নে গুৰুঘাট বজায়৷

হৰিনামৰ অমিয়া সুৰ, গায়ন–বায়নৰ ভক্তিভাৱপূৰ্ণ খোলৰ চেও আৰু ভকতিৰ ৰসত বুৰ গৈছে বৰপেটা সত্ৰ চৌহদ৷ পহিলা ব’হাগৰ দিনতোট সত্ৰত আঁঠু লৈ গুৰু দুজনাৰ আশীৰ্বাদ প্ৰাৰ্থনা কৰিছে ভক্তসকলে৷

পুৱাৰ প্ৰসংগৰ পিছতে বৰপেটা সত্ৰত বৰ্ষফল গণনা আৰম্ভ হ’ব৷ সত্ৰৰ দৈবজ্ঞই কৰা বৰ্ষফল গনণা শুনিবলৈ আজি সত্ৰখনত সমবেত হ’ব বৰপেটাবাসী প্ৰতিজন লোক৷ সত্ৰৰ কীৰ্তনঘৰৰ ভিতৰত প্ৰথমতে বৰ্ষফল গনণাৰ পিছতেই সত্ৰৰ মঠৰ চোতাল আৰু আইসকলে প্ৰসংগ কৰা কাঠিত পাঠ কৰা হ’ব বৰ্ষফল গনণা৷