ভাৰতৰ নিৰ্বাচন আয়োগে (Election Commission of India) ১০ এপ্ৰিলত আম আদমী পাৰ্টিক (Aam Aadmi Party) ৰাষ্ট্ৰীয় দলৰ মৰ্যাদা প্ৰদান কৰাৰ লগতে তৃণমূল কংগ্ৰেছ দল (Trinamool Congress), ৰাষ্ট্ৰীয়তাবাদী কংগ্ৰেছ দল (NCP) আৰু ভাৰতীয় কমিউনিষ্ট পাৰ্টি (CPI) ৰ পৰা ৰাষ্ট্ৰীয় দলৰ স্বীকৃতি প্ৰত্য়াহাৰ কৰে।
ভাৰতীয় নিৰ্বাচন আয়োগে কৰ্ণাটক উচ্চ ন্যায়ালয়ক (Karnataka High Court) জনোৱাৰ মাত্ৰ কেইদিনমানৰ পিছতে সিদ্ধান্ত লোৱা হৈছে যে ১৩ এপ্ৰিলৰ পূৰ্বে যেতিয়া কৰ্ণাটক বিধানসভা নিৰ্বাচনৰ গেজেট অধিসূচনা জাৰি কৰা হ’ব তেতিয়া ‘ৰাষ্ট্ৰীয় দল’ৰ মৰ্যাদা প্ৰদানৰ বাবে আম আদমী পাৰ্টীৰ আবেদনৰ সিদ্ধান্ত ল’ব।
২০২২ চনৰ ডিচেম্বৰ মাহত আপে (AAP) ৰাষ্ট্ৰীয় দলৰ মৰ্যাদা প্ৰদানৰ বাবে আবেদন দাখিল কৰিছিল। নিৰ্বাচন আয়োগে কয় যে চাৰিখন ৰাজ্য — দিল্লী, গোৱা, পঞ্জাৱ আৰু গুজৰাটৰ নিৰ্বাচনী প্ৰদৰ্শনৰ ভিত্তিত আপক ৰাষ্ট্ৰীয় দল হিচাপে ঘোষণা কৰা হৈছে। দিল্লী আৰু পঞ্জাৱত অৰবিন্দ কেজৰিৱাল নেতৃত্বাধীন দলটোৱে ক্ষমতাত আছে।নিৰ্বাচনী প্ৰতীক (সংৰক্ষণ আৰু আবণ্টন) অধিনিয়ম, ১৯৬৮ অনুসৰি ৰাষ্ট্ৰীয় দলৰ মৰ্যাদা লাভ কৰিবলৈ হ’লে ৰাজনৈতিক সংগঠন এটাই চাৰিখন ৰাজ্যত ৰাষ্ট্ৰপক্ষ হিচাপে স্বীকৃতি লাভ কৰিব লাগিব আৰু নিজ নিজ বিধানসভাত কমেও দুজন সদস্য থাকিব লাগিব।
সোমবাৰে জাৰি কৰা আদেশত আয়োগে উত্তৰ প্ৰদেশত আৰ এল ডি, অন্ধ্ৰ প্ৰদেশৰ বি আৰ এছ, মণিপুৰৰ পি ডি এ, পুডুচেৰীত পি এম কে, পশ্চিম বংগত আৰ এছ পি আৰু মিজোৰামত এম পি চিক প্ৰদান কৰা ৰাজ্যিক দলৰ মৰ্যাদাও বাতিল কৰে।
শেহতীয়া ঘোষণাৰ লগে লগে ভাৰতত ৰাষ্ট্ৰীয় দলৰ সংখ্যা ৬টালৈ হ্ৰাস পাইছে — ভাৰতীয় জনতা পাৰ্টি (BJP), কংগ্ৰেছ, CPI(M), বহুজন সমাজ পাৰ্টি (BSP), নেচনেল পিপলছ পাৰ্টি (NPP) আৰু আম আদমী পাৰ্টী। আয়োগে কয় যে সদ্য সমাপ্ত বিধানসভা নিৰ্বাচনত এন চি পি আৰু তৃণমূল কংগ্ৰেছক ক্ৰমে নাগালেণ্ড আৰু মেঘালয়ত ৰাজ্যিক দল হিচাপে স্বীকৃতি দিয়া হ’ব।
ইয়াৰ উপৰিও নাগালেণ্ডৰ লোক জনশক্তি পাৰ্টি (ৰাম বিলাস), মেঘালয়ৰ ভইচ অৱ দ্য পিপল পাৰ্টি আৰু ত্ৰিপুৰাত টিপ্ৰা মোথাক “স্বীকৃতিপ্ৰাপ্ত ৰাজ্যিক ৰাজনৈতিক দল”ৰ মৰ্যাদা প্ৰদান কৰে।