মহাৰাষ্ট্ৰৰ পুনেত সংঘটিত হোৱা এক মৰ্মান্তিক দুৰ্ঘটনাত ৬জনকৈ শ্ৰমিকে মৃত্যুক সাৱটি ল’বলগীয়া হৈছে। শ্ৰমিককেইজন নিৰ্মীয়মান অট্টালিকাটোৰ তলত শুই আছিল।
নিদ্ৰাৰত অৱস্থাতে অট্টালিকাটোৰ গাঁথনিৰ লোহাৰ শ্লেব শ্ৰমিক কেইজনৰ ওপৰত খহি পৰে। ফলত থিতাতে ছয়জন শ্ৰমিকৰ মৃত্যু ঘটে।
বাতৰি অনুসৰি, পুনেৰ ইয়াৰবদা শাস্ত্ৰীনগৰ অঞ্চলত বৃহস্পতিবাৰে মাজ নিশা এই মৰ্মান্তিক ঘটনাটো সংঘটিত হয়।
ঘটনা সংঘটিত হোৱাৰ পাছতে অগ্নিনিৰ্বাপক বাহিনীৰ ঘটনাস্থলীত উপস্থিত হৈ উদ্ধাৰ কাৰ্য চলায়।
আৰক্ষীয়ে জানিবলৈ দিয়া মতে এটা শ্বপিং মল নিৰ্মাণৰ কাম চলি আছিল আৰু তাতেই শ্ৰমিককেইজনে কাম কৰিছিল। দিনটো কাম কৰি তেওঁলোকে বেছমেন্টৰ গাড়ী পাৰ্কিঙৰ স্থানত শুই পৰিছিল।
শুই থকা শ্ৰমিককেইজনৰ ওপৰত হঠাতে প্ৰকাণ্ড লোহাৰ শ্লেব খহি পৰে। তীব্ৰ শব্দ শুনি স্থানীয় লোক ঘটনাস্থলীত উপস্থিত হোৱাৰ লগতে আৰক্ষীক খৱৰ দিয়ে।
আৰক্ষী আৰু অগ্নিনিৰ্বাপক বাহিনীৰ লোক ঘটনাস্থলীত উপস্থিত হৈ ছয়জন শ্ৰমিকৰ মৃতদেহ উদ্ধাৰ কৰে। ঘটনাত আহতসকলক ততাতয়াকৈ হাস্পাতালত ভৰ্তি কৰোৱা হৈছে।
আৰক্ষীয়ে ইতিমধ্যে গোটেই ঘটনাটোৰ তদন্ত প্ৰক্ৰিয়া আৰম্ভ কৰিছে।