ক্ৰমাৎ দীঘলীয়া হৈ গৈছে দুৰ্নীতিগ্ৰস্ত ছাইবুৰ ৰহমানৰ সম্পত্তিৰ তালিকা

আয়ৰ সৈতে সামঞ্জস্যহীন সম্পত্তি আহৰণ কৰি আৰক্ষীৰ জালত পৰা ৰাজ্য চৰকাৰৰ সংখ্যালঘু উন্নয়ন বিভাগৰ উপ–সচিব চাইবুৰ ৰহমানৰ এটাৰ পাছত আন এটা সম্পত্তিৰ ওপৰত আৰম্ভ হৈছে তালাচী অভিযান৷ মুখ্যমন্ত্রীৰ বিশেষ তদাৰকী শাখাই বুধবাৰে গুৱাহাটীত দুটাকৈ প্রাসাদোপম অট্টালিকাত অভিযান চলাই সোণ–হীৰা আৰু মাটিৰ নথি–পত্র উদ্ধাৰ কৰাৰ পিছত বৃহস্পতিবাৰে পুনৰ দুর্নীতিগ্রস্ত বিষয়াজনক লৈ বৰপেটাৰ কয়াকুছিত চলালে অভিযান৷

বৃহস্পতিবাৰে অভিযানকালত পুনৰ নতুন নতুন সম্পত্তিৰ তথ্য পোহৰলৈ আহে৷ ধনকুবেৰ চাইবুৰ ৰহমানৰ গুৱাহাটীত ২৬টা মাটিৰ প্লট থকাৰ লগতে দুটাকৈ আছে বিয়াগোম অট্টালিকা৷ বৰপেটাতো এইজন দুর্নীতিগ্রস্ত বিষয়াই ক্রয় কৰিছে ৪১টাকৈ মাটিৰ প্লট৷ বৰপেটা জিলাত থকা তেওঁৰ ৪১টা মাটিৰ প্লটৰ সৰহসংখ্যকেই হৈছে কৃষিভূমি৷

১০০ বিঘাতকৈ অধিক এই কৃষিভূমিৰ লগতে চাইবুৰ ৰহমানৰ আছে পেট্র’ল পাম্প, ৩০খন ভাৰাতীয়া দোকান আৰু আন কেইবাটাও ঘৰ৷ ইতিমধ্যে অভিযানকালত চিনাক্ত হোৱা অট্টালিকাৰ মূল্য কিমান হ’ব, সেই সন্দর্ভত গড়কাপ্টানী বিভাগৰ জৰিয়তে মূল্যায়নৰ কাম আৰম্ভ কৰিছে তদন্তকাৰী দলে৷

পৰ্বতসম সম্পত্তিৰ তালিকা ৰাজহুৱা হোৱাৰ পিছতে ৬দিনৰ মুখ্যমন্ত্ৰী তদাৰকী শাখাৰ জিম্মাত থকা ACS ছাইবুৰ ৰহমানৰ সঘনাই অৱনতি ঘটিছে স্বাস্থ্যৰ ৷ বাৰম্বাৰ স্বাস্থ্য পৰীক্ষা কৰাটো বিচাৰিছে ACS গৰাকীয়ে৷ যাৰ বাবে শুকুৰবাৰে পুৱাই MMCHত স্বাস্থ্য পৰীক্ষাৰ বাবে লৈ অনা হয় ACS ছাইবুৰ ৰহমানক৷

স্বাস্থ্য পৰীক্ষা কৰিয়ে পুনৰ ছাইবুৰক লৈ যোৱা হয় পাণবজাৰ থানাৰ লকআপলৈ৷ অহা ৩০ আগষ্টলৈ আৰক্ষীৰ জিম্মাত থকা ছাইবুৰক প্ৰয়োজনত পুনৰ জিম্মাত বিচৰা সম্ভাৱনাই এতিয়া প্ৰকট হৈ উঠিছে ৷